12 C
Ahmedabad
Saturday, January 15, 2022
spot_imgspot_img

Latest Posts

જામનગરની જી.જી. હોસ્પિટલ ખાતે મ્યુકોમાઈક્રોસિસ સારવાર માટે સુવિધા ઉભી કરાઈ

  • મ્યુકોમાઈક્રોસિસના દર્દીઓ માટે જી.જી. હોસ્પિટલ ખાતે ૭૪ બેડની અત્યાધુનિક સુવિધા
  • જામનગરની જી.જી. હિસ્પિટલમાં હાલ કુલ ૩૯ દર્દીઓ લઇ રહ્યા છે સારવાર
  • તાત્કાલિક નિદાન તથા સારવારથી મ્યુકોમાઈક્રોસિસથી થતા નુકસાનથી બચી શકાય
  • જી.જી. હોસ્પિટલના તજજ્ઞો દ્વારા વિસ્તૃત જાણકારી આપવામાં આવી

હાલ કોવિડની સાથે સાથે સમગ્ર રાજ્યમાં મ્યુકોમાઈક્રોસિસના કેસોમાં પણ વધારો જોવા મળી રહ્યો છે. ત્યારે આ રોગના લક્ષણો તથા આ રોગથી બચવા લોકોએ કેવા પગલાં તથા કાળજી લેવી જોઈએ તથા જી. જી. હોસ્પિટલ ખાતે આ રોગને અટકાવવા કેવી તૈયારીઓ કરવામાં આવી છે તે અંગે જી.જી.હોસ્પિટલના તજજ્ઞો દ્વારા વિસ્તૃત જાણકારી આપવામાં આવી છે.

જેમાં જી. જી. હોસ્પિટલના ઇ.એન.ટી. વિભાગના ડો.નિરલ મોદી જણાવે છે કે, મ્યુકોમાઈક્રોસિસમાં કોવિડ હિસ્ટ્રી ધરાવતા દર્દીને માથામાં દુખાવો થવો, નાકમાં દુખાવો થવો અથવા લોહી નીકળવું, ચહેરા પર એક તરફ દુખાવો થવો, દાંત ઢીલા પડી જવા, એક તરફ માથું દુખવું આ બધા પ્રાથમિક લક્ષણો છે. ડાયાબિટીસ, કોવિડના ગંભીર દર્દીઓ તેમજ લાંબા ગાળાની કિડનીની બીમારી હોય તેવા લોકોને મ્યુકોમાઈક્રોસિસ થવાની શક્યતાઓ વધી જાય છે. ત્યારે તાત્કાલિક નિદાન તથા સારવાર લેવાથી મ્યુકોમાઈક્રોસિસથી થતા નુકસાનથી બચી શકાય છે કારણ કે આ રોગ આંખમાં, નાકમાં કે મગજ સુધી પ્રસરે ત્યારે દર્દી માટે મુશ્કેલીઓ વધી શકે છે. જો કોઈ પણ દર્દીને ઉપર મુજબના કોઈપણ લક્ષણો જણાય તો તેણે તાત્કાલિક નિદાન કરાવવું ખૂબ જ જરૂરી છે.

હોસ્પિટલના આંખ વિભાગમાં સેવા આપતા ડો. રાધાએ જણાવ્યું હતું કે, કોવિડના ગંભીર દર્દીઓમાં મ્યુકોમાઈક્રોસિસના લક્ષણો જોવા મળે છે. આ રોગ કાનના રસ્તેથી આંખ તથા મગજ સુધી પહોંચે છે આવા સંજોગોમાં દર્દીની દ્રષ્ટિ ગુમાવવાની શક્યતાઓ પણ વધી જાય છે.ત્યારે જો દર્દી તાત્કાલિક સારવાર લે તો મ્યુકોમાઈક્રોસિસથી થતા નુકસાનથી બચી શકે છે.આ રોગની સારવાર માટેની તમામ અત્યાધુનિક સુવિધાઓ જી.જી. હોસ્પિટલ ખાતે ઊભી કરવામાં આવેલી છે.

મ્યુકોમાઈક્રોસિસને અટકાવવા અંગે મેડિસિન વિભાગના વડા ડો.મનીષ મહેતાએ જણાવ્યું હતુ કે, આ રોગથી બચવા સુગરને સંતુલીત રાખવું, જરૂર પડે ઈન્સ્યુલીનનો ઉપયોગ કરવો, સ્વચ્છતા રાખવી, બિમારીના લક્ષણો જણાયે તુરંત સારવાર શરૂ કરવી ખુબ જરૂરી છે. આ માટે તજજ્ઞોને અલગથી તાલીમ આપવામાં આવી રહી છે તેમજ જી.જી.હોસ્પિટલની ઈન્ફેકશન કન્ટ્રોલ ટીમ પણ સતત કાર્યરત છે.

જી.જી.હોસ્પિટલ ખાતે મ્યુકોમાઈક્રોસિસની સારવાર માટે કરવામાં આવેલી તૈયારીઓ અંગે માહિતી આપતા કોરોના નોડલ ઓફિસર ડો.એસ.એસ.ચેટરજી જણાવે છે કે, જી.જી. હોસ્પિટલમાં મ્યુકોમાઈક્રોસિસના દર્દીઓની સારવાર માટે પૂરતી વ્યવસ્થા કરવામાં આવી છે જે માટે કોવિડ બિલ્ડિંગમાં ૪૪ બેડનો અલગથી ખાસ વોર્ડ તૈયાર કરવામાં આવ્યો છે જ્યાં મેડિકલ સારવાર તથા જરૂર પડ્યે સર્જીકલ સારવાર પણ કરવામાં આવી રહી છે. કોવિડ હોસ્પિટલ ખાતે ૪૪ બેડ તથા જુની જી.જી.હોસ્પિટલ ખાતે ૩૦ મળી કુલ ૭૪ બેડની વ્યવસ્થા ઊભી કરાઇ છે. જ્યાં હાલ જુની હોસ્પિટલ ખાતે ૧૭ તેમજ કોવિડ હોસ્પિટલ ખાતે ૨૨ મળી કુલ ૩૯ દર્દીઓ સારવાર લઇ રહ્યા છે.

કેમેરામેન કેતન રાવલ સાથે જગદીશ ખેતીયા લાઈવ ગુજરાત ન્યૂઝ જામનગર

Latest Posts

Don't Miss

Stay in touch

To be updated with all the latest news, offers and special announcements.

%d bloggers like this: